Oleh : Agus Rahmat Nugraha
Kalawan nyebut asmana Allah aza’ wajala, alhamdulillah tina mangpirang-pirang kanikmatan nu geus katampi ti nu Maha Kawasa Allah SWT. Tugas urang minangka hambaNa, euweuh deui lian ti syukur anu diwujudkeun ku sujud sinembah ka ManteNa dipirig ikhlas lillahi ta’ala. Salaku makhluk nu dhoif, euweuh kajabi hayu urang ningkatkeun ajen diri di hadapan Gusti ku cara netelakeun ciri kaimanan urang ku cara nyieun amal sahade-hadena jeung sanyata-nyatana pikeun sakabeh semesta ieu. Ulah poho urang boga papagon dina organisasi rek jadi kader negarawan pikeun ngarambah kahirupan pinunjul dina gerak langkah Islam Berkemajuan. Watek nu pika hareup dina hal ieu tinangtu hadirna budak ngora nu payus jadi hareupan kolot, umat, persyarikatan, kaasup bangsa jeung nagara.
Ieu tulisan ngahaja dipintonkeun, kajurung kurasa nyaah kacida , bari aya sauetik kahariwang tinu jadi lanceuk keur adi-adi na nu dipikacinta. Euweuh saeutik ge pretensi hayang kasohor atawa ngiluan ngigeul kulantaran aya irigan temang elegi anu keur tumiba ka aranjen, barudak ngora anu keur benteng ngambah kahirupan organisasi. Komo deui lain rek ulubiung, lain rek jadi lauk buruk milu mijah, nauzubillah. Kuring natrat dina ati ieu mah sakali deui kanyaah, poma ulah dianggap trik lain-lain, lain pansos, tapi bener-bener kusabab kaimpi-impi yen aranjen teh ‘bayangan’ mangsa kahareup nu bakal jadi pamingpin persyarikatan, umat, jeung bangsa.
Dina tiap babadamian, rek eta ngadongeng di warung kopi, atawa rada gaya di cafe, dina gempungan rada resmi, sabangsa rapat, musyawarah atawa muktamar atawa naon wae ngaranna, geus ti beh ditu persyarikatan mah boga kaonjoyan anu lain wae bangga keur nu di jero, tapi batur jeung dulur nu di luar ge kabitaeun, malah mandar geus loba nu nyuprih elmu ka imah persyarikatan. Lain dek ge-er, lain oge primordial kumu deui rek ashobiyyah mah, kuring jeung aranjen pasti ngarasa bungah nu teuaya papa dana, bingah kagiri-giri, dina bab ieu urang teh boga pakaya anu gede pisan hargana, luhung, jeung kudu terus dimumule ku kabeh nu ngarasa jadi anggahota atawa komo pisan kader utamana mah. Cita-cita jalma hayang jadi pamingpin eta faktual, tapi jero njng ati jeung inti sistemna mah kumaha ngaruwat eta amanah. Sabab nu ngarana amanah lain wae urusan duniawi, tapi didinya sakaligus aya urusan ukhrowi, anu teu bisa kaluar tina prinsip dasar (dumasar prinsip tarjeh), diantara, yakni “masuliyah” (kudu dipertanggung jawabkeun awal akhir ka pemilik jiwa urang kabeh). Bener teu bisa disumpu-sumput yen dina perkembangan zaman kiwari , aya varian lain dina program babadamian (musyawarah milih pamimpin), sebut weh ngagalang kakuatan jeung elektoral, ngumpulkeun daya upaya mangrupa pendekatan jeung strategi, bahkan siyasah, jeung teu pamohalan lamun oge aya tambahan logistik jeung sponsorsif. Salila teu ngaruksak sistem nilai agama jeung darigama meren mubah nukitu mah, sok urusan muamalahna mah bisa wae dikreasikeun, nu cadu kudu dikukut mah sifat jubria, sirik, pidik, jail kaniyaya ka papada dulur. Komo ieu mah kontestasi jeung dulur saagama, salembur ,sapaguron, sa ideologi, kaditu na sa persyarikatan, saguru saelmu.
Dumasar kana hal eta, keur pasukan inti jiga urang-urang mah rasana aya nu kudu disikapj teh, anu mudah2an jadi alat pikeun bisa leuwih ‘wise’ tur dewasa kajareupna, diantarana:
Kahiji, sok masih rajen aya rasa truth claim, asa pang kaderna, pang layakna, pang cape na, pang si loba aksesna, pang pinterna, malah da pemuda ieu mah lain pemudi, asa pang “kasep” na, beu. Ieu adi-adi mangkade urang kudu ngajaga diri jeung organisasi teh. Nalika aya rasa saperti kitu, sabab tidieu sabenerna nu jadi cukang lantaran ajen diri nu kudu na pinunjul diganti ku wajud kabodoan jeung ka pangecut an dina bentuk ageman ‘monopoly of truth’, ngaborong sagala kasanggupan jeung kadigdayaan, padahal landasan organisasi urang teh nepi ka iraha-iraha ge kudu kolektif kolegial dina landasan keikhlasan (tauhid), katulusan (al adalah jeung al qisti) jeung babarengan guyub (ukhuwah jeung musawah).
Kadua, sok aya keneh diantara urang teu lepas tina nostalgia jauh teung nepika poho, yen hirup urang teh sesana poe ayeuna keung isukan, sing inget hirup mah kahareup majuna teh lain cicing oge lain komo deui mun rek maju katukangmah. Bener mun hirupmah kudu ninggali mangsa katukang tapi tong remen teuing siga ninggali kaca spion, da eta mah sakali-kali ditempo nage, da nu kudu loba diyingali mah kaca gede nyaeta poe ieu jeung kahareup. Maksud kuring, sok pirajenan ngabanding-banding zaman, yen baheula mah pamuda teh gede wawanenna, tokohna mentereng, geus kitu geus kieu sumbangsih, warisan na ublag ablag, patriotisme na teu disangsikeun, pokokna mah “wah”, terutama dina hal intelektual jeung moral, bener eta teh, tapi merhatikeun eta tong leleb teuing, bahkan nepi kaleuleuban. Hai budak ngora ,tiap zaman aya jelem na, tiap jelema aya zamanna. Zaman urang rek kamana, faaina tadhabun, geus boga naon, rek jadi naon, rek ninggalkeun legacy naon? Kolot, senior, jeung tokoh baheula geus alus, tapi ulah make rumus “ini bapakku”, tapi mana “dadamu”, hey urang mah lain ngandelkeun nasab jeung trah, komo fanatik kana nasabmah. Geus waktuna pikeun urang ayeuna nunjukkeun yen budak ngora boga kahayang, kabisa jeung cita-cita leuwih hade. Senior boga masa lalu, budak ngora boga masa depan.
Katilu, persyarikatan kawentar hade gawena, ti mimiti rencana, ngolah, mateakeun, nyieun keputusan, kiprah jeung sumbanganna, nepi kana ngontrol aktivitasna geus kacida rapi, bener-bener dina trekna, ninjak kekecrek, malah mindeng apanan urang meunang pujian titel “organisasi profesional”. Hal ieu tangtu kudu diimbangi ku hadirna insan-insan anu jiwa jeung lampahna ge nu profesional tangtuna. Dina perihal ieu, kuring mah sok nyaliksik diri, hayang pisan kitu teh, tapi prak-prak an teu gampang, sabab jalma loba kahayang jeung loba nu can katedunan, antukna kena paribasa ‘tilunggil dirarud catang dirumpak’, prgmatisme ngababi buta, kusabab rusuh sieun katingaleun dulur, sieun teu kaagean, jeung sieun teu jadj nanaon, utamana dina haliyah dunia. Didieu sok karasa posisi ngadua ngatilu, tumiba kamunafekan hadir, kumaha cara narabas jalan pintas, sagala tarekah dilakukeun, telunjuk lurus kelingking berkait, motong jaitan baju ceuk paribasa, nu penting urang meunang naon, teu paduli teuing batur mah kumaha nasibna, naudzubillah. Didieu togencang antara iman jeung hawa nafsu, yakin hati namah nolak kana kamunafekan teh, tapi hawa nasu bedas (menyala) ngalindih hatena. Sifat manusia lemah hadir ngajengelek ditutupan ku life style para seniman materi sok sanajan ngabohongan diri, kaluar jurus jeung rumus nu dipake “keun engke ge aya waktuna tobat,” meungpeung jag-jag, mun teu ayeuna rek iraha deui.
Kaopat, eta sok aya keneh semangat rurusuhan hayang jadi pamingpin. Fastabiqul khaerat kudu ditafsir deui supaya proporsional jeung merenah di organisasi teh. Silih saing dina balap ngan dina kahadean, babaladan ngan dina al birr wa taqwa wungkul, tapi tong maksa kabeh hayang meunang, da hirup.mah perjalanan, aya nu juara, aya nu kudu eleh, aya nu bungah aya nu sedih, hirup mah papasangan, salilana kudu dihiasan syukur jeung sabar. In syaa Allah kuring yakin, jadi pimpinan di persyarikatan ari geus mangsana mah bakal karandapan, moal kusaha. Rumusna teu menang menta, tapi mun dibere amanah cadu kudu mundur. Geus kacida kewesna di organisasi urang mah, jadi pamimpin lain ngadaftarkeun sorangan, lain menta komo maksa mah, apan di urang mah jadi pamimpin teh kudu di calon keun (rekomended) sasuai mekanismena. Prak, hayu urang mumule, komo urang mah salangkah leuwih canggih tibatan dulur nu lain, apan boga e.voting, piraku masih make utek jahili mah.
Kalima, sok urang pedar dina waktu sejen nu tumaninah, da elmu jeung pangalaman kudu sili lengkeupan, moal aya jalma nu pang bisana di organisasi mah, komo deui nu pang suci na mah.
Samemeh mungkas, kuring rek ngingetan ka adi-adi, ulah jati kasilih ku junti, yen nalika aya momentum musyawarah didinya rasa na harga jeung ajen diri bakal dipintonkeun, bahkan dilalajoan ku batur. Saha diri urang teh, kapasitas jeung integritasna model kumaha, ah bakal natrat katingali ku sarerea. Sok tampilekun uswah jeung kautamaan amanah, kudu boga komara jeung wiwaha, panteskeun diri, yen jadi pamimpin teh lain soal hayang jeung resep tapi aya konsekuensina, nyeta niyyat hade, gawe bener, lampah pujieun, teu bau-an, kudu silih asih,asah, jeung asuh, jeung pang-pangna kudu daek jadi role model ulah pagiri-gir calik, pagirang-girang tampian.
FASTABIQUL KHOIROT.
Simkuring,
A.R.Nugraha, NBM.833.782
